NJË KARRIERË SI PROFESOR I FIZIKËS NË GJIMNAZ!

Përfitimi që keni si Fizikan

Të jesh mësimdhënës i fizikës në gjimnaz, mund të jetë një eksperiencë shumë e mirë për çdokënd. Profesorët e fizikës në gjimnaz, shpesh punojnë me nxënësit më të mirë dhe me nxënësit të cilët kanë një motiv shumë të lartë për shkollim, të cilët mbarojnë shkollat e mesme të cikleve të ulëta në vendin tonë. Unë si fizikan që kam punuar me vite në gjimnazin e Prizrenit, dhe jam munduar që nxënësve të mi, tu shpjegoj fizikën që nga ajo elementare, teorike (matematikore), eksperimentale, e deri te fizika moderne e kohës së sotme, ndërsa shpesh kam kaluar kohë të tëra duke ju sqaruar nxënësve të arriturat e fizikës apo edhe mrekullitë e pafundme të universit fizik.

Modeli i një fizikani serioz i cili ka njohuri të mjaftueshme për fizikën, dhe i cili nuk i ka mbaruar studimet me sugjerime apo preferenca siç po ndodh në shoqëritë në ndryshim, e sheh fizikën si një shkencë fundamentale e cila ju prinë zbulimeve dhe shpikjeve shkencore. Fizika gjatë historisë së shkencës humane, gjithmonë ka qenë prijëse e zbulimeve të mëdha shkencore të cilat e kanë bërë jetën e njeriut të sotëm shumë më të lehtë dhe më interesante. Të gjitha zbatimet teknologjike të shkencës së kohës moderne që po i  përjetojmë sot, i kanë dhënë shtytje zhvillimit të shoqërisë njerëzore dhe janë të bazuara gati tërësisht në ligjet e shkencës së fizikës. Biologjia, Kimia, Shkencat mjedisore, Shkencat teknike, Shkencat për studimin e Tokës dhe hapësirës janë të bazuara në fizikë.

Duke inspiruar të rinjtë dhe duke i përgatitur shkencëtarët e ardhshëm të shkencave të sakta, një profesor i gjimnazit, patjetër duhet të jetë në gjendje që me shpjegimin e tij, të ‘’prek të ardhmen’’ e shkencës, gjë të cilën sot pak kush mund ta bëjë që nuk është fizikan.

Edhe në kohën e sotme, kur është shumë vështirë të gjesh punë, nëse jeni fizikan i kualifikuar, mund të vini deri te puna fare lehtë dhe pa kurrfarë problemi, për shkak se profesorët e fizikës sot janë shumë të kërkuar, e kështu do të jetë edhe në të ardhmen. Gjetja e një pune të kënaqshme, zhdërvjelltësia në zgjidhen e shumë problemeve shkencore dhe teknike, dhe afinitete tjera të kësaj natyre, bëjnë që një fizikan i kompletuar të fitojë shumë para, të ketë një pagë të mirë, dhe kjo është shumë e mundshme dhe reale.

Kush mund të bëhet Fizikan?

Në vendet e zhvilluara jo gjithkush ‘’e ka nderin’’ të bëhet fizikan, edhe pse te ne ndodh që fizikani të ketë njohuri shumë të kufizuara! Mirëpo sot, të bëhesh fizikan i vërtetë është punë e zorshme, dhe jo gjithkush mundë ti përballojë një procesi të tillë të ngritjes intelektuale deri te formimi si fizikan enciklopedik. Pa aftësi solide intelektuale, vendosmëri të madhe për të arritur rezultate, si dhe vetëbesim në aftësitë tuaja zor se mund të bëhesh fizikan.

Një person i cili vërtetë donë të bëhet fizikan, duhet të ketë një interesim maksimal për shkencën në tërësi dhe nuk duhet të jetë i kufizuar nga njohuritë e përgjithshme, si dhe duhet të ketë një pasion të veçantë për fizikën në veçanti. Fizikani duhet të ketë një natyrë kureshtare (kurioze) për çdo gjë, si dhe duhet të ketë veti kreative (krijuese).

Të jesh fizikan d.m.th., të shohësh ligjet e fizikës duke operuar (vepruar) kudo që shikon përskaj teje.

Fizikani si person kënaqet kur është në prani të njerëzve intelektual. Është e vërtetë se fizikanët kanë një veti që duan të jenë në mesin e tjerëve, dhe shpesh ata janë të konsumuar nga dëshira që të bartin dashurinë e tyre për shkencën edhe tek të tjerët. Ata shpesh digjen nga vullneti i zjarrtë për të ndikuar te nxënësit apo studentët e tyre, si dhe te njerëzit tjerë përreth, që të merren me probleme shkencore.

Si të bëjmë një zgjidhje të drejtë në karrierën tone?

Si mundet dikush të vijë deri te vendimi për të studiuar apo jo fizikën, për tu bërë fizikan studiues, apo profesor i fizikës në gjimnaz apo fakultet? Përgjigja është shumë e thjeshtë ‘’Mësoni nga suksesi i tjerëve’’, por si sistem reference të merren vendet perëndimore ( mos i merrni si mostër ‘’fizikanët gjysmak’’, apo ata që i kanë mbaruar studimet me përkrahje, sugjerime apo preferenca jo-legjitime). Një sugjerim për nxënës: Bisedoni me prindërit tuaj, profesorin tuaj të preferuar të fizikës apo me kujdestarin tuaj të klasës, apo me dikë që vërtet ju donë të mirën. Ata besoj se do të kenë ndonjë ide për të ju këshilluar në lidhje me interesimin tuaj, duke pas parasysh aftësitë tuaja, dhe kjo mund të ju ndihmoj juve për të gjetur një zgjidhje të drejtë për karrierën tuaj të ardhshme intelektuale.

Për të bërë zgjidhjen e duhur të profesionit dhe karrierës tuaj të ardhshme, kërkoni çelësin e eksperiencës suaj dhe aftësive që ju posedoni. Shikoni se cilët janë njerëzit që ju admironi më së shumti, a janë ata profesorë, shkencëtarë, mjek, tregtarë, ushtarak, apo profesione tjera. Përcaktohuni për subjektin që ju gjeni interesimin tuaj më të madh. Analizoni se cilat lëndë ju kanë pëlqyer më shumë gjatë mësimeve në gjimnaz, ku keni treguar njohuri më shumë, cila lëndë ju ka pëlqyer më shumë, etj.

Përgjigja në këtë pyetje, do ju ndihmojë shumë në marrjen e një vendimi të mençur dhe do të bëjë që në të ardhmen të ju shpaguhet mundi i zgjidhjes që keni bërë për karrierën tuaj të mëvonshme.

Nëse përgjigja e juaj është ‘’po më pëlqen fizika’’, atëherë ju keni bërë zgjidhjen e duhur dhe të mençur e cila do të shpie kah sukseset e reja në karrierën tuaj.

                                                   Kujtim Baraliu_Profesor i Fizikës_Prizren